或者同大家分享下少少關於 IDENTITY 嘅歷史。

大家平時睇我哋嘅影片嚟嚟去去都淨係聽到同一把聲，但其實 IDENTITY 唔淨只一個人，佢係我哋五個人讀大學時搞嘅一個 project。當初之所以有咁嘅 idea 並唔係因為有咩崇高理念，而係純粹想五個人夾手夾腳砌啲嘢出嚟，make an impact，又或者只係簡簡單單 enjoy the journey。有咗呢個想砌啲嘢嘅空泛概念，下一步就當然係諗我哋究竟有能力整到啲乜。由於我哋五個主修嘅科目都算係同數學有些少關係，所以個 project idea 就慢慢向住教數呢個方向發展。

於是我哋就開始做下 research，睇下香港係咪已經有類似嘅平台。當時我哋發現網上其實已經有唔少關於數學嘅學習資源，但係普遍都有以下幾個問題：
[1] 只針對部分課題，並冇涵蓋整個課程
[2] 答題技巧為主，基礎概念只係輕輕帶過
[3] 文字資源居多，較少影片教學
[4] 學習資源零碎，欠缺連貫性
[5] 缺乏有系統嘅整合，難以搜尋

最終，我哋用咗一年半時間，喺 2016 年尾推出一個解決晒上述五個問題，並且免費開放嘅平台，亦即係過去幾年大家所見到嘅第一代 IDENTITY 網站。至於點解係免費？除咗開頭提過嘅 「make an impact」 同埋「推廣教育平等」呢個教科書答案之外，更重要嘅係，我哋覺得免費提供一啲用錢都買唔到嘅質素，係一件好有型嘅事。

IDENTITY 嘅推出，亦撞正我哋畢業嘅時間。往後嘅幾年我哋各有各忙，冇再更新網站，由得 IDENTITY 自然累積用戶。時間快轉到 2020 年，武漢肺炎令中小學被迫停課，網上學習一夜之間變成主流。呢段時間我哋收到唔少電郵、留言，意識到 IDENTITY 嘅作用比我哋當初預期大，而我哋亦更相信香港真係好需要一個有規模嘅免費網上學習平台。於是我哋開始著手更新網站，將 IDENTITY 翻新成你哋而家見到嘅介面，user-friendly 啲之外，亦方便我哋之後加插新功能。

出嚟做嘢都已經好幾年，菱角未至於被磨滅，但又似乎真係變得現實咗，唔似以前因為一個 make an impact 嘅衝動就埋頭苦幹一年半。我哋知道望緊呢段「關於我們」嘅你好大機會仲係學生，所以畀個機會我哋扮下老屎忽說下教啦：記住好好享受呢段世界圍住你轉嘅時光，有機會嘅就搵班豬朋狗友一齊天馬行空下，做一啲冇人做過嘅 project。成功固然最好，但就算結果不似預期，記住正如 Steve Jobs 所講：The journey is the reward。

2020 年 9 月